Журналистер арасында өткізілген байқау жеңімпаздары марапатталды
2018 жылғы 17 қазанда Достық үйінде Алматы қаласы Дін істері жөніндегі басқармасының ұйымдастыруымен діни экстремизм мен терроризмнің алдыну алу бойынша БАҚ өкілдері арасында өткізілген байқаудың жеңімпаздарын марапаттау өтті.
Байқаудың мақсаты:
- Қазақстан Республикасы жұртшылығының назарын дін саласындағы мемлекеттік саясаттың өзекті мәселелеріне аудару.
- Бұқаралық ақпарат құралдары, яғни журналистер арқылы тұрғындарды дін саласындағы мемлекеттік саясаттың басымдықтарын насихаттау, қоғамдағы конфессияаралық келісімнің нығайтылуы және сақталуына бағытталған маңызды іс-шаралар жөнінде хабардар ету.
- Дін саласындағы өзекті мәселелер бойынша материалдарды жариялайтын БАҚ мен журналистерді қолдау.
Іс-шараға Алматы қаласы Дін істері жөніндегі басқармасының басшысы А. Есенбеков, Әл-Фараби атындағы Қазақ ұлттық университеті Журналистика факультетінің деканы С. Медеубекұлы, Қоғамдық кеңестің мүшесі Қ. Шалабаев, «Журналистика мәселелерін ұлттық зерттеу орталығы» ҚҚ президенті Д. Смаил, журналистер және студент жастар қатысты.
Байқау ағымдағы жылғы 1 сәуір мен 1 қазан аралығында 9 номинация өткізіліп, 56 журналист пен қаламгер қатысып, жалпы саны 100-ден астам жұмыс келіп түсті.
Байқау қорытындысы бойынша «Ең үздік телевизиялық бағдарлама» аталымында 31 телеарнаның журналисті Ирина Советжанқызы, «Мерзімдік басылымдардағы қазақ тіліндегі ең үздік мақала» аталымында «Заң» газетінің тілшісі Түймегүл Ибашева, «Ең белсенді блогер» аталымында «Айқын» газетінің тілшісі Төреғали Тәшенов, «Үздік әлеуметтік бейнеролик» аталымында 31 телеарнаның журналисті Ардақ Камал, «Мерзімді басылымдардағы орыс тіліндегі ең үздік мақала» аталымында «Central Asia Monitor» республикалық қоғамдық-саяси газетінің тілшісі Сауле Исабаева, «Үздік радиобағдарлама» аталымында «Қазақ радиолары» жауапкершілігі шектеулі серіктестігі «Алматы» студиясының редактор-жүргізушісі Бақытжан Жармұхамбет, «Әлеуметтік желілердегі ең үздік белсенді қоғамдық топ» аталымында «Инстаграм», «Фейсбук», «ВКонтакте» әлеуметтік желілеріндегі «Біз экстремизмге қарсымыз» тобы, «Интернет желісіндегі орыс тіліндегі ең үздік мақала» аталымында «Zakon.kz» интернет басылымының арнайы репортаждар бөлімінің редакторы Торғын Нұрсеитова, «Интернет желісіндегі қазақ тіліндегі ең үздік мақала» аталымында әлеуметтану ғылымдарының магистрі Айсұлу Молдабекова жеңімпаз атанды.
Сондай-ақ, байқаудың ынталандыру сыйлықтарына «Түркістан» газетінің тілшісі Динара Мыңжасарқызы, «Алматы» телеарнасының «Ақшам алаңы» бағдарламасының жүргізушісі Үмбетәлі Меймеш, «Abai.kz» ақпараттық порталының редакторы Нұргелді Әбдіғаниұлы, Ахыска» халықаралық газетінің тілшісі Хошназарова Кальбинур, «Асыл арна» телеарнасының «Арнайы репортаж» бағдарламасының жетекшісі Алтынбек Рахымберді ие болды.
