Алматы қаласында 17 конфессия өкілдері бір шаңырақ астында өмір сүруде (Қазақстанда барлығы 18 конфессия бар).

Алматы қаласы Дін істері жөніндегі басқармасының қолдауымен және Алматы қаласы діни бірлестіктер көшбасшылары Клубының қызметі аясында «Social Development Center» Қоғамдық қорымен ағымдағы жылдың 21 қазан күні Іле өзені бойында орналасқан  Тамғалы Тас шатқалына және көшпенділер қаласына туристтік сапар ұйымдастырылды.

Аталған іс-шараға Алматы қаласы Дін істері жөніндегі басқармасының басшысы Н.М. Қиқымов және Қазақстан мұсылмандары діни басқармасы, Орыс Православ шіркеуі, Евангелиялық-христиан баптистері, Вон-буддизм және т.б. қаланың түрлі діни бірлестіктерінің өкілдерінен құралған Клубтың 20-дан астам мүшелері қатысты.

Тамғалы Тас шатқалында көптеген петроглифтер, әртүрлі буддисттік жазулар мен жартастағы бейнелер бар екенін атап өткен жөн. Ал, өзеннің арғы жағында отандық «Көшпенділер» фильмінің декорациясы ретінде салынған ортағасырлық қала орналасқан.

Өз кезегінде, аталған экскурсия Клуб мүшелерінің әдеттегі кездесулері секілді жылы достық деңгейінде өтті.

Діни бірлестік көшбасшыларының Клубы конфессияаралық бейбітшілік пен келісімді нығайту, мемлекеттік – конфессиялық қатынастардың өзекті мәселелерін талқылайтын диалог алаңы ретінде құрылған болатын.

Соңғы 3 жыл ішінде Клуб тек конфессия басшыларының кездесулерін ұйымдастырумен ғана шектелмей, сондай-ақ діни көшбасшылар мен жергілікті атқарушы билік өкілдерінің диалог  алаңына да айналып үлгерді.

Клуб мүшелері дін саласындағы мемлекеттік саясат және азаматтардың діни сенім бостандығы құқығын қамтамасыз ету мәселелері бойынша өз ұсыныстарын енгізуде.

Дін саласындағы сауатты мемлекеттік саясаттың нәтижесінде бүгінгі таңда Қазақстанда 100-ден астам этнос пен 18 конфессияның өкілдері бейбітшілік пен келісім аясында өмір сүруде.