Маусымда басталған дода Алматы қаласындағы 53 мешіт жамағатының арасында өткізілді. 2022 жылы жарысқа барлығы 418 команда қатысқан. Қаладағы 8 ауданда үздік атанған командалар финалдық кезеңге жолдама алып, 8 қазанда 1 миллион теңгені сарапқа салды. Олар: "әл-Әзім" (Алатау ауданы), "Төле би" (Алмалы ауданы), "Бақыткелді" (Бостандық ауданы), "әл-Хамид" (Медеу ауданы), "Ибраһим" (Наурызбай ауданы), "Ақсай" (Әуезов ауданы), "Түркісіб" (Түркісіб ауданы) және "Әли-Мұхаммед" (Жетісу) ауданы.
Жарыс ережесіне сәйкес 8 команда 2 командаға бөлініп, үздікті анықтады. Жартылай финалға шыққан "Бақыткелді", "әл-Хамид", "Ибраһим", "Ақсай" командалары ойын өткізіп, басым түскен "Ақсай" мен "әл-Хамид" командалары бас жүлде үшін бақ сынады.
Финалда кездескен Медеу мен Әуезов ауданының командалары тартысты ойын өткізді. Алайда Әуезов ауданының "Ақсай" командасы 1:0 есебімен жеңіске жетіп,1 миллион теңгені қанжығасына байлады. Ал екінші орын алған "әл-Хамид" ойыншыларының әрқайсысына велосипед табысталды.
Қола медаль үшін ойында Бостандық ауданына қарасты "Бақыткелді" мешітінің командасы мен Наурызбай ауданына қарасты "Ибраһим" мешітінің командалары кездесті. Жасыл алаңда бақ сынаған топтар тартысты ойын көрсетті. 3:2 есебімен аяқталған матчта Бостандық ауданының "Бақыткелді" командасы басым түсіп, ойыншылары спорт киімдер жиынтығы салынған сөмке иеленді.
Қатысушыларды марапаттаған Алматы қаласы Дін істері жөніндегі басқармасы басшысы Нұрлан Қиқымов тамаша ойын өрнегін көрсеткен футболшыларға алғысын жеткізді.
"Аталмыш жарыстың арқасында қаламызда өзіндік дәстүрі қалыптасып та үлгерді десек қателеспейміз. Алғашқы жылдары 200 команда жинаудың өзі мұң болатын. Ал, қазіргі таңда 418 команда қатысты. Осындай спорттық іс-шаралар барысында азаматтардың спортқа деген қызығушылығы оянып қана қоймай, еліміздің руханияты артып, мешітке келушілердің өзара түсіністігі мен бірлігі нығая түседі", – деді Алматы қаласы Дін істері жөніндегі басқармасының басшысы Нұрлан Қиқымов.
Қызыққа толы сайысты ұйымдастырған "Ұлттық мұра" бағдарламасының жетекшісі Айдос Багашев турнирдің осымен төртінші мәрте өткізілгенін атап өтті. Сөзінше, 2021 жылы жарысқа барлығы 300-ден аса команда қатысқан.
"Жарыстың мақсаты – қаладағы 53 мешіттің жамағаты арасындағы бірлікті нығайту, бұқаралық спортты дамыту және дәріптеу. Бұған дейін аудандық сайыстар өтті. Міне, үздік екенін дәлелдеген командалар қалалық кезеңде бақ сынап, бас жүлде үшін таласты. Іс-шара әкімдіктің тікелей қолдауымен өтті. Әзірге жарысымыз тек Алматы қаласында ғана өткізіледі. Егер өзге де қалаларда өтіп, командалар республикалық кезеңде ала доп шеберін анықтаса, нұр үстіне нұр болар еді", – деді Айдос Багашев.
Дүбірлі додада жеңіске жеткен "Ақсай" командасының ойыншысы Батыржан Боранбаев ойыннан алған әсерімен бөлісіп, ұйымдастырушыларға алғысын жеткізді
"Бұл жарысқа былтыр да қатысқанбыз. Алайда финалда пенальтиде есе жібердік. Биыл да бақ сынап, міне, бірінші иегері атандық. Жарыс жоғары деңгейде ұйымдастырылған, барлығына көп рахмет. Маусымнан бастап өзара мықтыны анықтап келдік. Мешіт жамағатын қолдауға, бірлігімізді нығайтуға бағытталған сайыстар мен шаралар көбейе берсе екен дейміз. Алдағы уақытта әлі де талай жарыста топ жарамыз деп сенеміз", – деді Батыржан Боранбаев.
Айта кетсек, "Ұлттық мұра" бағдарламасы 18 қазан – Рухани келісім күні қарсаңында Алматы қаласында спартакиада ұйымдастырмақ. Шара 23 қазанда өтеді деп жоспарланып отыр. Айдос Багашевтің сөзінше, спорттық жарысқа кез келген дін өкілдері қатысып, бағалы сыйлықтарды жеңіп ала алады.
