Қазір көпшілігі діни мәліметтерді ғаламтор бетіндегі түрлі сайттардан немесе әлеуметтік желілерден іздеп жатады. Сайт, әлеуметтік желіден жаңалық оқу бір жағынан заман ағысымен жүріп жатқан қалыпты үрдіс дегенімізбен, ғаламтордың ауқымы мен оның шексіз мүмкіндігін еске алсақ, бұл діни ақпарат көздерінің сенімді екеніне кепілдік беріле ме? Осы тұрғыда ғаламторда дін төңірегіндегі ақпараттарға сүзгі болмайтындықтан қандай ресми дереккөздерден мәлімет алуға болатынына тоқталайық.
[Китап пен галамтор Дин]
Кейде дінді оқып-үйренудің, YouTube-тегі ресми емес каналдардағы белгісіз тұлғалардың діни уағызын тыңдаудың, сондай-ақ ҚМДБ-ның сараптау комиссиясының мақұлдауынан өтпеген діни әдебиеттерді оқудың да салдары теріс ағымның жетегінде кету екеніне куә болып жатамыз. Бүгінгі таңда білім алудың осы заңдылығына мән бермей ғаламтор желісіндегі сенімсіз дереккөздер мен әлеуметтік желілерде таралған тұлғасы белгісіз адамдардың уағызы мен келу қайнары белгісіз діни мәтіндерді, діни көзқарастарды ұстану, насихаттау, олардың айтқанын амалға асыру адасушылыққа алып келіп жатады. Құран аяттары мен хадистерді өз бетінше, жүйелі білім болмастан түсінуге тырысу да адамды жат діни көзқарастарға жетелейтінін естен шығармаған абзал.
Дін туралы сенімді ақпаратты қайдан табуға болады?
Алматы қаласы Дін істері жөніндегі басқармасы religionmap.kz қаланың интерактивті картасын әзірледі, ол жерден мешіттер, шіркеулер мен синагогалардан бастап, рұқсат етілген әдебиеттерді тарататын дүкендер және үй-жайлар мен басқа да ғибадат орындары секілді барлық діни мекемелер туралы ақпаратты табуға болады. Мұның барлығы діндер және олардың құрылымы мен идеологиясы туралы шынайы ақпаратты тарату үшін әзірленген.
Өзекті жаңалықтар, тақырыптардағы маңызды және пайдалы мақалалар, ақпараттық бейнероликтер мен пайдалы әдебиеттер тұрғысынан барлық сенімді ақпаратты Алматы қаласы Дін істері жөніндегі басқармасының ресми парақшаларынан да табуға болады.
Бүгінгі таңда Қазақстан мұсылмандары діни басқармасының ресми сайты muftyat.kz, сонымен бірге muslim.kz, azan.kz, sunna.kz, ummet.kz, mazhab.kz, т.б. отызға жуық діни сайт жұмыс істейді. Діни құндылықтарды осындай сенімді ресурстардан үйрену керек. Сонымен қатар, Ақпарат және қоғамдық даму министрлігінің Дін істер комитетіне қарасты kazislam.kz порталы бар. Бұнда да дәстүрлі Ислам құндылықтары, дін мен дәстүр сабақтастығы, жат ағымның алдын алу бағыттары бойынша жұмыстар атқарылып келеді.
