Алматыда дін саласының өзекті проблемаларын көтеріп, мақала, контент дайындаған азаматтар арасында байқау ұйымдастырылып жатыр. Қатысушылар үздік орыс және қазақ тіліндегі мақала, үздік бейнеролик, үздік өлең, үздік пікір, үндеу, ұран және тағы басқа 10 номинация бойынша материал дайындап, 250-300 мың теңге көлемінде жүлде ұтып ала алады. Басты талап – халықты дін саласындағы мемлекеттік саясаттың маңызды бағыттары мен экстремистік және радикалды діни ағымдар идеологиясының зияны жөнінде хабардар ету. Бұл туралы Stan.kz ақпарат агенттігі хабарлайды.

Байқауды Алматы Дін істері жөніндегі басқармасының тапсырысы бойынша "JASTAR" дамыту орталығы" жастар қоғамдық бірлестігі ұйымдастырып жатыр. Өтініш қабылдау бүгін, 10 сәуірде басталып, 1 қазанға дейін жалғасады. Дайын материалдарды қазылар алқасы 20 қазанға дейін қарайды. Айта кетері, 10 номинация бойынша барлық материал
белгіленген жерде талапқа сай жариялануы керек және бекітілген нысаны бойынша almaty.baiqau.2024@mail.ru ресми поштасына жіберілуі қажет. Жұмыстар онлайн режимде қабылданады.

Байқау номинациялары:

1. Интернет-ресурстағы қазақша үздік мақала (жүлде қоры – 300 000 теңге);
2. Интернет-ресурстағы орысша үздік мақала (жүлде қоры – 300 000 теңге);
3. Instagram әлеуметтік желісіндегі үздік бейнеролик (жүлде қоры – 300 000 теңге);
4. TikTok әлеуметтік желісіндегі үздік бейнеролик (жүлде қоры – 300 000 теңге);
5. Үздік әлеуметтік бейнеролик (жүлде қоры – 350 000 теңге);
6. Digital Art шеңберінде үздік фотожоба (жүлде қоры – 250 000 теңге);
7. Үздік өлең (жүлде қоры – 250 000 теңге);
8. Үздік үндеу және ұран (жүлде қоры – 250 000 теңге);
9. Үздік пікір (жүлде қоры – 250 000 теңге);
10. Әлеуметтік желілердегі үздік тақырыптық пост (жүлде қоры – 250 000 теңге).

Сонымен қатар қатысушыларға 50 мың теңгеден 5 ынталандыру сертификаты табысталады. Осы 10 номинация бойынша жалпы жүлде қоры – 3 050 000 теңге. Байқауға Алматының барлық 16 жастан асқан тұрғыны қатыса алады.

Мақалалар интернет ресурста жариялануы керек. Ал басқалары әлеуметтік желіде жарияланып, Алматы Дін істері басқармасының парақшасы белгіленуі керек. Үздік өлең номинациясына қатысушылар шығарған шумақтарын оқып, видео түсіріп, өзінің парақшасына жариялап, басқарманың аккаунтын белгілеуге міндетті.

Сонымен қатар үздік пікір номинациясы бойынша пікір Алматы Дін істері басқармасының Instagram парақшасындағы биылғы кез келген постына жазылуы керек. Пікір көлемі – 100 сөйлем.

Ұйымдастырушылардың сөзінше, биыл материалдар мына тақырыптар аясында қабылданады: ағартушылық, толеранттық, конфессияаралық келісім, қазақ халқының рухани құндылықтары, дәстүр және дін, патриотизм, Отанға деген махаббат, Қазақстанның тарихи және қасиетті орындары, радикалды діни идеологияның қаупі және діни экстремизм. Барлық дайындалған материалдар діни экстремизм идеологиясының зияны туралы хабардар етуге, сондай-ақ қазақ халқының дәстүрлі және рухани құндылықтарын түсіндіруге бағытталуы керек.

"Бейнероликтер және басқа да материалдар қоғамдағы діни экстремизмнің алдын алу мақсатында дайындалуы керек. Теріс діни ағымды ұстанатын азаматтардың қоғамға әсері, олардың дәстүрді қалай жоққа шығаратыны және біздің қоғам үшін қаншалықты зиян екені туралы болуы керек. Талаптар барлық тұрғын орындай алатындай етіп құрастырылған. Пікір, мақала жазыңыз, пост жариялаңыз, видео түсіріңіз. Негізгі мақсатымыз – қоғамда діни экстремизм мен терроризмнің алдын алу бойынша қатысушыларды ынталандыру, осы бағыттағы материалдардың кең таралуын, халыққа жетуін қамтамасыз ету. Шамамен 500 адам қатысады десек, осынша қатысушының дайындаған дүниесін бәрі көреді, оқиды. Көрген адамдарға осы ақпарат әсер етеді, осылайша қоғамда иммунитет қалыптасады", – деді Алматы Дін істері жөніндегі басқармасының бөлім басшысы Бақдәулет Әбдіхамитов.

Бөлім басшысының айтуынша, тағы бір ескеретін жайт: мақалалар мен контенттер дәл осы байқауға арналып, 10 сәуір мен 1 қазан аралығында жариялануы керек. Сонымен қатар жарияланымда "Мақала Алматы Дін істері басқармасының байқауы аясында жасалды" деп көрсетілуі керек.

"Ереже мен тақырыпқа сай дүниелер жасалса, басқа тақырыптарға ауысып кетпей, нақты мақсатқа сай орындалса, сіздің ұтуға деген мүмкіндігіңіз жоғарылайды. Жүлде қоры үлкен. Егер қатысушы жасаған дүниесін поштаға жіберіп, бірақ желіге жарияламаса немесе керісінше болса, байқауға қатыспайды. Осыны ескеріңіздер. Көбіне біз қатысушыларға хабарласып, түзеу қажет дүниелерді айтамыз. Егер сонда да түзелмесе, байқау ережесіне сай оны қабылдай алмаймыз", – деді "JASTAR дамыту орталығы" жастар қоғамдық бірлестігінің төрағасы Қаныбек Мұратбаев.

Байқау ережелерін Алматы қаласы Дін істері жөніндегі басқарманың ресми пақаршасынан немесе басқарманың Instagram-дағы @din_almaty парақшасынан оқуға болады.