Польшада Рождестволық жәрмеңкеде теракт дайындады деген күдікпен 19 жастағы студентке айып тағылды. Ол ұзақ уақыт бойы шабуылға дайындалып келген.

Польша билігінің мәліметінше, Католик университеті (Люблин) студенті Рождестволық жәрмеңкеде теракт жасауды жоспарлағаны үшін ұсталған. 19 жастағы жасөспірім «ИГИЛ» террористік ұйымына қосылуды көздеген.

Матеуш В. заң факультетінің бірінші курсында оқыған. Қазіргі таңда ол оқуынан шеттетіліп, сот шешімімен алдағы үш айды қамауда өткізетін болды.

Министр-координатордың арнайы қызметтер жөніндегі баспасөз хатшысы Яцек Добжиньскийдің айтуынша, Ішкі қауіпсіздік агенттігі жүргізген операция барысында күдіктінің дерек сақтау құрылғылары, ұялы телефоны және исламға қатысты заттар тәркіленген.

Ұлттық прокуратура мәліметінше, Матеуш В.-ның әрекеттері түрлі әңгімелер жүргізу мен байланыстар орнатуды, соның ішінде «ИГИЛ» өкілдерімен қарым-қатынас жасауды, сондай-ақ жарылғыш заттар туралы ақпарат жинау мен оларды алу жолдарын зерттеуді қамтыған.

Прокуратура өкілі брифинг барысында: «Ол ислам мен терроризмге қатты әуестеніп, ИГИЛ-пен байланыс орнатуға ұмтылған», — деп мәлімдеді. Оның айтуынша, Ішкі қауіпсіздік агенттігінің уақтылы әрекеті «үлкен қасіреттің алдын алды».

Добжиньскийдің сөзінше, Матеуш В.-ның басты мақсаты — қоғамда қорқыныш тудыру және «ИГИЛ»-ді қолдау болған.

Бұл іс бойынша тергеуді Щецин қаласындағы Ішкі қауіпсіздік агенттігінің бөлімшесі жүргізіп жатыр. Тергеу Батыс Помор воеводствосының ұйымдасқан қылмыс пен сыбайлас жемқорлыққа қарсы департаментінің бақылауымен жүзеге асуда.

Рождестволық жәрмеңкелер террористердің нысанасына айналуда

Соңғы жылдары Еуропа қалаларындағы Рождестволық жәрмеңкелер террористердің назарын жиі аударып келеді. Әдетте шабуылдарды жалғыз әрекет ететін адамдар суық қару, жарылғыш заттар немесе көлік құралдары арқылы жүзеге асырады. Қылмыскерлердің радикалдануы көбіне интернет арқылы жүреді.

2024 жылдың желтоқсанында Магдебург қаласында автокөлік жәрмеңке келушілерінің арасына кіріп, салдарынан бес адам, оның ішінде бір бала қаза тауып, 200-ден астам адам жарақат алды. Қылмыскер оқиға орнында ұсталды.

Бір жылдан кейін, 2025 жылдың желтоқсанында Германия полициясы Бавария федералды жерінде жоспарланған теракттің жолын кесті. Бес ер адам көлікпен адамдар тобына соғуды көздеген.

Осы оқиғалардан кейін билік қауіпсіздік шараларын күшейтіп, жәрмеңкелерде бөгеттер мен бақылау-өткізу бекеттерін орнатты.

Францияның Страсбург қаласында қараша айының соңында Рождестволық базар маңынан оқ-дәрілері бар жарамды тапанша табылған.

Қауіпсіздік мақсатында биыл Парижде Елисей алаңдарындағы концерттің күші жойылды. Адамдардың жаппай жиналуын азайту үшін Париж мэриясына полиция префектурасы арнайы өтініш жолдап, ол қанағаттандырылған.

АҚШ-та Жаңа жыл түніне жоспарланған терактілердің алды алынды

АҚШ-та Жаңа жыл түні бірқатар теракт дайындады деген күдікпен төрт адам ұсталды. Тінту барысында Оңтүстік Калифорнияның бірнеше нүктесінде, соның ішінде Лос-Анджелесте шабуыл жасау жоспарларын қамтитын көптеген заттай дәлелдер тәркіленген.

АҚШ БАҚ-тарының жазуынша, ұсталғандар өздерін «Тасбақа аралын азат ету майданының» радикалды тармағының мүшесі ретінде таныстырған. Бұл — пропалестиналық ұстанымды, антиүкіметтік идеологияны қолдайтын және құқық қорғау органдарына қарсы әрекеттерді жақтайтын ультрасолшыл ұйым.

Дереккөз: euronews.com