Ақтөбе қаласының №2 соты Ақтөбе облысы бойынша қылмыстық-атқару жүйесінің №8 мекемесінде жазасын өтеп жүрген ер адамға үкім шығарды. Ол терроризмді насихаттап, діни алауыздықты қоздырғаны үшін жауапқа тартылды.

Тергеу мәліметінше, 2024 жылдың желтоқсанында ер адам колонияның тәртіптік изоляторында отырған кезде басқа сотталғандар арасында радикалды діни көзқарастарды таратқан.

Ол діни себептермен жасалатын зорлық-зомбылықты ақтап, қарулы күрестің қажеттілігі туралы айтқан, «қарулы жиһад» идеясын қолдаған және адамдарды дініне байланысты кемсітетін пікірлер білдірген. Сонымен қатар, мекеме қызметкерлеріне және өзі «кәпірлер» деп атаған адамдарға күш қолдануды дұрыс деп санағаны анықталды.

Әңгімелер жасырын тергеу әрекеттері барысында жазылып алынған. Кешенді сот діни сараптамасы оның сөздерінде терроризмді насихаттау және діни алауыздықты қоздыру белгілері бар екенін растады.

Сот процесі кезінде ер адам кінәсін мойындап, өкінетінін айтты. Ол жазбаларда тіркелген сөздерді шынымен айтқанын растады.

Сот психологиялық-психиатриялық сараптама тағайындады. Сарапшылар оның тұлғалық бұзылысы бар екенін анықтағанымен, оны есі дұрыс деп таныды, яғни өз әрекеттерінің мәні мен қоғамдық қауіптілігін түсінген.

Фемида кінәні мойындауын жеңілдететін мән-жай ретінде ескерді. Сонымен бірге оның қауіпті қайталанушы қылмыскер екені анықталды. Бұған дейін ол аса ауыр баптар бойынша ұзақ мерзімге сотталған, ал жаңа қылмыстарын жазасын өтеу кезінде жасаған.

Сот үкімі бойынша терроризмді насихаттағаны үшін оған 8 жыл, діни алауыздықты қоздырғаны үшін 6 жыл жаза тағайындалды. Қылмыстар жиынтығы бойынша 10 жыл белгіленді. Бұған алдыңғы үкімнің өтелмеген бөлігінің бір бөлігі қосылып, түпкілікті жаза 18 жыл 4 айды құрады. Ол жазасын қатаң режимдегі мекемеде өтейді. Үкімге шағым түсіруге болады.

Дереккөз: Kazislam.kz порталы