Соңғы он жылда ЮНЕСКО-ның репрезентативтік тізіміне қазақ халқына тән 14 элемент енгізілді.
Қазақстан үкіметі қырымның «Қырық батыр» эпикалық жырын ЮНЕСКО-ның материалдық емес мәдени мұра тізіміне енгізу үшін номинация дайындауды жоспарлап отыр. Бұл туралы премьер-министр Олжас Бектенов депутаттық сауалға берген жауабында мәлімдеді.
22 қаңтарда сенатор Бекбол Орынбасаров үкіметке аталған эпосты ЮНЕСКО тізіміне енгізу бойынша халықаралық жұмысты жеделдетуді және мұраны заңнамалық деңгейде қорғау тетіктерін қарастыруды ұсынған.
Бектеновтың айтуынша, биыл Қазақстан тазы және бүркітпен аңшылыққа арналған «Салбурын» фестивалін ЮНЕСКО тізіміне енгізу үшін ұлттық номинациялық досье ұсынуды жоспарлап отыр. ЮНЕСКО ережелеріне сәйкес, мемлекеттер екі жылда бір рет қана ұлттық номинация бере алады. «Қырық батыр» эпосын енгізу мәселесі осы талаптарға сай келетін уақытта қаралады.
2024 жылдың желтоқсанында ЮНЕСКО беташар дәстүрін материалдық емес мәдени мұра тізіміне енгізді. Сонымен қатар Маңғыстау облысындағы бес жерасты мешіті Дүниежүзілік мұра тізіміне енгізуге дайындалып жатыр.