Қазақстан Республикасы Президенті Әкімшілігі Басшысының бірінші орынбасары Ерлан Қарин Facebook парақшасында Қазақстанда діни шектеулерден бұрын мемлекет заңдарының басымдығы сақталатынын атап өтіп, білімді, ғылымды, өнер мен мәдениетті қолдаудың маңыздылығына тоқталды.

— Әлеуметтік желіде тойда тілек айтып тұрып, орынсыз діни уағыз айтқан азаматтың видеосын көрдім. Оның әйелдерге қатысты қабылдауға болмайтын сөздері, сондай-ақ әншілер мен музыка өнеріне деген теріс көзқарасы халқымыздың құндылықтарына мүлде жат. Бұл біздің ұлттық дүниетанымымызға сәйкес келмейді. Қазақстан — зайырлы мемлекет. Басты бағдарымыз — Конституция. Біздің елімізде діни шектеулер емес, мемлекет заңдары бірінші орында тұрады. Сондай-ақ өнер мен мәдениетті дінге қарсы қоюға болмайды. Бұл — шектен шығудың көрінісі. Мемлекет білімді, ғылымды, өнер мен мәдениетті қолдау жолын таңдады, — деп жазды Ерлан Қарин.

Оның айтуынша, адамдарды көпшілік алдында бөліп-жару және өз көзқарасын өзгелерге таңу өзара құрмет пен әдеп қағидаларына қайшы келеді.

— Біз өзара сыйластықты, қарым-қатынас мәдениетін және әр адамның қадір-қасиетін жоғары бағалаймыз. Сондықтан елімізде жаңа қоғамдық этиканы қалыптастыруға ерекше көңіл бөлініп отыр. Қоғам ретінде ұлттық болмысымыз бен мемлекеттік ұстанымдарымызға қайшы келетін мұндай әрекеттерге бірге қарсы тұруымыз қажет, — деді Ерлан Қарин.

Дереккөз: Kazislam.kz