АҚШ-тың Калифорния, Колорадо, Кентукки және Нью-Джерси штаттары Meta компаниясынан балалар мен жасөспірімдерді әлеуметтік желілердің ықтимал зиянды әсерінен қорғауға бағытталған шараларды күшейтуді талап етуде.
Associated Press мәліметінше, 18 тамызда Калифорния штатының Окленд қаласындағы федералдық сотта Meta компаниясына қарсы іс бойынша негізгі сот отырыстары басталады.
Штаттар Meta компаниясын Facebook пен Instagram платформаларында балалар мен жасөспірімдердің әлеуметтік желілерде көбірек уақыт өткізуіне ықпал ететін тәуелділік тудыратын функцияларды әдейі әзірледі деп айыптап отыр. Талапкерлердің нұсқасы бойынша, компания платформалардың кәмелетке толмағандардың психикалық денсаулығына ықтимал зияны туралы білгеніне қарамастан, табысын арттыру үшін осы механизмдерді қолдануды жалғастырған.
Сонымен қатар компанияға ата-анасының келісімінсіз 13 жасқа толмаған балалардың деректерін жинады деген айып тағылып отыр. Бұл АҚШ-тың федералдық заңнамасына қайшы.
Штаттар Meta-дан қаржылық өтемақы төлеуді, жас ерекшелігіне байланысты шектеулер енгізуді, шексіз лентадан бас тартуды және контентті ұсыну алгоритмдерін өзгертуді талап етуде.
Meta компаниясының өз есептеулеріне сәйкес, егер сот әрбір болжамды құқық бұзушылық үшін ең жоғары мөлшердегі айыппұл тағайындаса, төлемдердің жалпы сомасы теориялық тұрғыда 1,4 триллион долларға дейін жетуі мүмкін. Компания мұндай санкцияны бұрын-соңды болмаған және тағылған айыптарға сәйкес келмейтін шара деп атады. Meta өкілдері ата-аналармен, сарапшылармен және құқық қорғау органдарымен жұмыс істеп жатқанын, сондай-ақ кәмелетке толмағандарды қорғауға арналған жаңа құралдарды енгізіп жатқанын мәлімдеді.
Сот процесі алты-сегіз аптаға дейін созылуы мүмкін. Куәлік беруге Meta негізін қалаушы Марк Цукерберг пен Instagram басшысы Адам Моссери шақырылуы мүмкін.
Meta компаниясына қарсы талапты 2023 жылы АҚШ-тың 29 штаты бірлесіп берген. Алғашқы сот процесі осы төрт штаттың талаптарына қатысты өтеді. Қалған 25 штаттың істері кейін қаралуы жоспарланған.
Дереккөз: Associated Press, Informburo.kz.
