21 тамызда Біріккен Ұлттар Ұйымы Халықаралық терроризм құрбандарын еске алу және құрмет көрсету күнін атап өтеді. Бұл күн терроризмнен қаза тапқан және зардап шеккен адамдарды еске алуға, сондай-ақ олардың құқықтарын қорғау мен ұзақ мерзімді қолдаудың маңыздылығына назар аударуға арналған.

2026 жылдың тақырыбы — «Healing through Memory» («Естелік арқылы сауығу»).

Биыл БҰҰ терроризм құрбандары мен зардап шеккендердің оқиғаларын сақтау, оларды еске алу және мемориализацияның маңыздылығына ерекше назар аударып отыр. Ұйымның атап өтуінше, жәбірленушілер туралы естеліктерді сақтау олардың қалпына келуіне, қадір-қасиетін нығайтуға және қоғамдағы әлеуметтік бірлікті қалыптастыруға ықпал етеді.

Цифрлық ортадағы қауіпсіздікке де ерекше көңіл бөлінеді. Құрбандар туралы оқиғалар мен материалдарды дұрыс пайдаланбау немесе орынсыз тарату олардың қайта жарақаттануына әкелуі мүмкін. Сондықтан терроризм құрбандары туралы ақпаратты тарату кезінде олардың құқықтары, жеке өмірі мен қадір-қасиеті сақталуы қажет.

2026 жылғы 21 тамызда БҰҰ Бас хатшысы Антониу Гутерриштің, халықаралық ұйымдар өкілдері мен терроризмнен зардап шеккендердің қатысуымен жоғары деңгейдегі онлайн іс-шара өтеді. Бағдарламада терроризм құрбандарының сөз сөйлеуі, қаза тапқандарды еске алуға арналған жаһандық бір минуттық үнсіздік және «Building a Safer Internet for Victims of Terrorism» бастамасының таныстырылымы жоспарланған.

Аталған бастама терроризм құрбандары мен зардап шеккендердің цифрлық ортада кездесетін қауіптеріне, соның ішінде онлайн-зиянға назар аударып, цифрлық платформалар үшін қауіпсіз әрі жәбірленушілердің құқықтары мен мүдделерін ескеретін орта қалыптастыруға бағытталған.

Халықаралық терроризм құрбандарын еске алу және құрмет көрсету күні терроризмнен зардап шеккендерді есте сақтаудың, олардың отбасыларына қолдау көрсетудің, құқықтары мен қадір-қасиетін қорғаудың маңыздылығын еске салады.

Дереккөз: Біріккен Ұлттар Ұйымы