Австрияда 2026 жылғы 1 қыркүйектен бастап 14 жасқа толмаған қыздарға мектепте ислам дәстүріне сәйкес басты жауып тұратын орамал тағуға тыйым салатын заң нормасы күшіне енді.
Тыйым мемлекеттік және жекеменшік мектептерге қолданылады. Австрияның Білім туралы заңындағы нормаға сәйкес, 14 жасқа толмаған оқушы қыздарға мектепте басты ислам дәстүріне сай жабатын орамал тағуға болмайды. Бұл талап мектептен тыс жерде өткізілетін сабақтар мен мектеп іс-шараларына қолданылмайды.
Заң талаптарын бұзған жағдайда алдымен мектеп әкімшілігі оқушы және оның ата-анасымен немесе заңды өкілдерімен түсіндіру жұмыстарын жүргізеді. Қайталанған жағдайларда заңда әкімшілік жауапкершілік қарастырылған. Кейінгі бұзушылықтар үшін 150-ден 800 еуроға дейін айыппұл салынуы мүмкін.
Австрия билігі бұл шараны кәмелетке толмаған қыздардың өзін-өзі анықтауын, теңдігін және еркін дамуын қорғау қажеттілігімен байланыстырады. Үкіметтің ресми түсіндірмесінде сондай-ақ мұсылман отбасыларынан шыққан кәмелетке толмаған қыздарды оқшаулау мен қысымнан қорғау мақсаты көрсетілген.
Заң жобасы Австрия Ұлттық кеңесінде 2025 жылғы желтоқсанда қабылданған. Оны биліктегі партиялармен қатар Австрияның Еркіндік партиясы (FPÖ) қолдаған, ал «Жасылдар» партиясы заң жобасына қарсы дауыс берген.
Бұған дейін Австрияның Конституциялық сотына аталған тыйымға қатысты өтініштер берілген. Алайда 2026 жылғы шілдеде сот оларды рұқсат етілмеген деп танып, өтініш берушілерге заң ол кезде әлі тікелей қолданылмағанын негізге алды. Сот бұл шешімде тыйымның Конституцияға сәйкестігі мәселесін мәні бойынша қараған жоқ.
Қазіргі уақытта заң оқу жылының басталуымен іс жүзінде қолданыла бастады. Австриядағы мұсылман ұйымдары бұл шараны кемсітушілік деп бағалап, оны Конституциялық сотта қайта қарату ниетін білдіріп отыр.
