Қазақстанға «Жусан» арнайы гуманитарлық операциясы аясында оралған азаматтардың басым бөлігі радикалды көзқарастарынан бас тартып, қоғамдағы өмірге бейімделіп жатыр. Бұл туралы ҚР Мәдениет және ақпарат министрлігінің Дін істері комитеті мәлімдеді, деп хабарлайды Kazinform агенттігінің тілшісі.

2019–2023 жылдар аралығында құзырлы органдардың шетелдік әріптестермен тығыз өзара іс-қимылы нәтижесінде «Жусан» арнайы гуманитарлық операциясы сәтті жүзеге асырылды.

— Мәдениет және ақпарат министрлігі, құқық қорғау және жергілікті атқарушы органдардың, сондай-ақ дін саласындағы мамандардың бірлескен күш-жігерінің арқасында бүгінде репатрианттардың басым бөлігі радикалды көзқарастарынан бас тартты. Олардың көпшілігі Қазақстанға дәстүрлі ислам бағытын ұстанады. Олардың арасында радикалды діни және экстремистік көзқарастар мен идеяларды қабылдамау ұстанымы қалыптасты, — деп хабарлады комитет.

Ведомствоның мәліметінше, өңірлерде әйелдердің әлеуметтік-экономикалық бейімделуіне ерекше көңіл бөлінеді. Жергілікті атқарушы органдар олардың бейбіт өмірге бейімделуіне және қоғамға кірігуіне бағытталған түрлі қолдау шараларын ұйымдастырады.

Атап айтқанда, әйелдер үшін оқыту курстары өткізіліп, жұмысқа орналасуына жәрдем көрсетіледі. Кәсіпкерлік қызметті бастауға гранттар беріледі, ал жекелеген отбасыларға тұрғын үй мәселесін шешуге көмек көрсетіледі.

— Сонымен қатар қоғамдық қорлар, демеушілер және түрлі ұйымдар мұқтаж отбасыларға киім-кешек пен азық-түлік түрінде көмек көрсетеді. Мешіттер де қайырымдылық шараларына қатысады. Діни мерекелер кезінде, соның ішінде Құрбан айтта азық-түлік таратылады. Сондай-ақ репатрианттардың балаларына оқу жылына дайындалуға көмек көрсетіледі. Атап айтқанда, балалар мектеп формасымен және кеңсе тауарларымен қамтамасыз етіледі, — делінген комитет жауабында.

Комитет бұл шаралар репатрианттардың бейбіт өмірге бейімделуіне және олардың қоғамға кірігуіне бағытталғанын атап өтті.

Бұған дейін Kazinform Қазақстанда діни білім беретін мамандарды қай оқу орындарында даярлайтыны туралы жазған болатын.